ઇન્ડિયન રેડક્રોસ સોસાયટી મોડાસા દ્ધારા સર્વોદય હાઈસ્કૂલ ખાતે વિના મૂલ્યે એનીમિયા ચેક અપ કાર્યક્રમ યોજાયો, 800 થી વધુ વિધાર્થીઓનું ચેક અપ કરવામાં આવ્યું.
ઇન્ડિયન રેડક્રોસ સોસાયટી અરવલ્લી જિલ્લા શાખા મોડાસા અને શ્રીમદ્દ રાજચંદ્ર હોસ્પિટલ & રિસર્ચ સેન્ટર, ધરમપુરના સંયુક્ત ઉપક્રમે ‘એનીમિયા મુક્ત ભારત’ કાર્યક્રમના સમર્થનમાં અરવલ્લી જીલ્લામાં ‘એનીમિયા મુક્ત અરવલ્લી’ પ્રોજેકટ શરૂ કરવામાં આવ્યો છે. જેમાં જિલ્લાના તમામ ગામ, શહેર અને શાળાઓમાં હિમોગ્લોબિનની તપાસ કરવામાં આવશે. ‘સર્વ મંગલ ફેમિલી ટ્રસ્ટ’ અને ‘શાહ હેપીનેસ ફાઉન્ડેશન’ ના સહયોગથી તપાસ દરમિયાન તમામ વય જૂથના વ્યક્તિઓ જેમનું હિમોગ્લોબિન ઓછું હોય તેમને 3 મહિના ની ઉચ્ચ ગુણવત્તાની દવાઓ વિનામૂલ્યે આપવામાં આવશે અને ત્રણ મહિના પછી ફરી તેમની તપાસ કરવામાં આવશે. આ પ્રોજેકટની અરવલ્લી જીલ્લામાં શરૂઆત કરવામાં છે. શ્રી સી.જી. બુટાલા સર્વોદય હાઈસ્કૂલ, શ્રી બી.વી. બુટાલા માધ્યમિક હાઇસ્કૂલ તથા શ્રી સી.જી. બુટાલા ઉચ્ચતર પ્રાયમરી વિભાગમાં હિમોગ્લોબિનનું ચેક અપ શરૂ કરવામાં આવ્યું. રેડક્રોસના ચેરમેનશ્રી ભરતભાઈ પરમારએ પ્રોજેકટ વિશે માહિતી આપી હતી અને આયોજન બદલ શાળાના હોદ્દેદારોનો આભાર વ્યક્ત કર્યો હતો. આ પ્રસંગે સર્વોદય હાઈસ્કૂલના મંત્રી અને પ્રભારીશ્રી કિરીટભાઇ શાહ, આચાર્યશ્રી મયંકભાઇ ભટ્ટ તથા સ્ટાફ ગણ હાજર રહ્યો હતો. રેડક્રોસની નિષ્ણાંત ટિમ દ્ધારા સર્વોદય હાઈસ્કૂલના વિધાર્થી ભાઈ-બહેનોનું હિમોગ્લોબિન ચેક કરવામાં આવ્યું હતું અને તેઓને જરૂરિયાત પ્રમાણે દવાઓ આપવામાં આવી હતી. આ પ્રોજેકટ દ્ધારા દરરોજ વિવિધ શાળા, ગામના તમામ વિધાર્થીઓ, વ્યક્તિઓનું હિમોગ્લોબિન ચેક કરી ‘એનીમિયા મુક્ત અરવલ્લી’ બનાવવાનું સ્વપ્ન છે.
